ఆమె ఓ రాక్‌స్టార్‌‌: షెఫాలీ వర్మపై సెహ్వాగ్​ కామెంట్

టీ20 వరల్డ్‌కప్‌లో గురువారం న్యూజిలాండ్‌తో జరిగిన మ్యాచ్‌లో అద్భుతంగా బ్యాటింగ్‌ చేసిన భారత మహిళల జట్టు యువ ఓపెనర్‌‌ షెఫాలీ వర్మపై మాజీ క్రికెటర్‌‌ వీరేందర్ సెహ్వాగ్ ప్రశంసల వర్షం కురిపించాడు. ఆమె ఓ రాక్‌స్టార్‌‌ అని కొనియాడాడు. అలాగే, కివీస్‌పై ఉత్కంఠ విజయం సాధించి సెమీఫైనల్ చేరిన భారత జట్టును సెహ్వాగ్ అభినందించాడు. అమ్మాయిల ప్రదర్శన  తనను ఎంతగానో సంతోషపరిచిందని ట్వీట్‌ చేశాడు. ఈ మ్యాచ్‌లో భారత్ నాలుగు పరుగుల తేడాతో న్యూజిలాండ్‌ను ఓడించింది. షెఫాలీ వర్మ 34 బంతుల్లోనే 46 పరుగులు సాధించి జట్టు విజయంలో కీలక పాత్ర పోషించింది. సెమీస్‌ చేరిన భారత జట్టును వీవీఎస్‌ లక్ష్మణ్ కూడా అభినందించాడు.